កណ្តាល៖ កាលពីយប់ថ្ងៃទី២៩ ខែមករា ឆ្នាំ២០២៣ មានករណីផ្ទុះអាវុធបាញ់ចំនួនជិត ១០គ្រាប់នៅចំណុចគល់ស្ពានដើមលាភ ភូមិព្រែកហូរកើត១ សង្កាត់ព្រែកហូរ ក្រុងតាខ្មៅ ខេត្តកណ្តាល បណ្តាលឱ្យបុរសម្នាក់របួសត្រង់ភ្លៅខាងស្តាំ។

អធិការនៃអធិការដ្ឋាននគរបាលក្រុងតាខ្មៅ លោកវរសេនីយ៍ឯក យី វណ្ណដា បានប្រាប់មក EAC Newsឱ្យដឹងថា សមត្ថកិច្ចកំពុងតែស៊ើបអង្កេតស្រាវជ្រាវរកជនសង្ស័យដែលបានកាន់កាំភ្លើងដេញបាញ់បុរសម្នាក់ឱ្យរងរបួស តាមបទបញ្ជាពីស្នងការនៃស្នងការដ្ឋាននគរបាលខេត្តកណ្តាល លោកឧត្តមសេនីយ៍ទោ ឈឿន សុចិត្ត។

លោកវរសេនីយ៍ឯក យី វណ្ណដា បានគូសបញ្ជាក់ថា សមត្ថកិច្ចមានតម្រុយ និងកំពុងតែសាកសួរមនុស្សដែលពាក់ព័ន្ធនឹងករណីនេះ ហើយនឹងអាចឈានដល់ការឃាត់ខ្លួនជនសង្ស័យឆាប់ៗនេះ។

នាយប៉ុស្តិ៍នគរបាលរដ្ឋបាលព្រែកហូរ លោកវរសេនីយ៍ត្រី ឯម ចាន់រ៉ាត់ បានគូសបញ្ជាក់ថា ថាករណីនេះ មិនមែនជាករណីកើតឡើងដោយសារជម្លោះក្នុងរង្វង់ផឹកស៊ីនោះទេ ពោលវាកើតឡើងក្រោយពីរំសាយវង់ផឹកស៊ីរួច ក៏មានជនសង្ស័យបានជិះម៉ូតូមកដេញបាញ់ជនរងគ្រោះដែលដើរទៅត្រង់គល់ស្ពានដើមលាភបណ្តាលឱ្យរងរបួសត្រង់ភ្លៅខាងស្តាំ ដោយបច្ចុប្បន្នជនរងគ្រោះកំពុងតែសម្រាកព្យាបាលនៅផ្ទះក្នុងស្ថានភាពដែលអាចដើរបានធម្មតា៕